ريهام سعيد بعد حكم حبسها: القرار من فوق.. خسارة ضيعت حلمي عشان “الغلابة”

نشرت المذيعة ريهام سعيد، مقدمة برنامج “صبايا الخير”، تدوينة عقب قرار محكمة جنح قسم الجيزة حبسها سنة و6 أشهر وغرامة 10 آلاف جنيه، بتهمتي السب والتشهير في القضية المعروفة إعلاميا بـ”فتاة المول”.

وقالت ريهام سعيد، عبر حسابها الشخصي على “فيس بوك”، منذ قليل، “النهارده بلدي كرمتني.. بعد 13 سنة بعالج كل الناس وبخدم كل اللي حواليه، بعد 12 سنة فتحت مدرسة لذوي الاحتياجات الخاصة وعالجت آلاف الأطفال بفضل الله، مانمتش وماكلتش حتى فلوس والله ما أخدت.. ضيعت عمري عشان أعمل حاجة للبلد دي، ضيعت حلم التمثيل اللي تعبت في الجامعة فيه عشان ماسيبش الناس الغلابة”.

وأضافت ريهام، “كنت ماشية عكس التيار عشان أقول الحق، أخدت النهارده سنة ونص سجن، كنت بلف العالم أدور على علاجات جديدة للناس الغلابة، وعمري ما قصدت ولا حاولت أشهر بحد.. الإعلام مافهوش حاجة اسمها ستر مع اني ماتكلمتش لحد دلوقتي.. ساعات الحقيقة بتكون فضيحة”.

وتابعت “كل الناس اللي بتغلط وتشتم وتشهر بجد نجوم دلوقتي! المحامي بيقولي ده أمر من فوق.. فوق فين؟ كنت بقول (تحيا مصر) ويحيا العدل فين العدل؟.. ريهام سعيد مجرمة لكن مرتضى مثلا عمره ما شهّر بحد.. خسارة يا بلدي، خسارة مجهودي.. خسارة يا مصر”.