هجوم حاد على نشوى مصطفى بسبب البطاطا.. والفنانة: كنت بياعة في العتبة
تعرضت الفنانة المصرية نشوى مصطفى لهجوم حاد، بعد أن نشرت صورة لمجموعة من الشباب الجامعي وهم يبيعون البطاطا، وحيتهم على عملهم بشدة.
النشطاء اتهموا نشوى بأنها لا تشعر بالشباب، وأنها تؤيد عمل الشباب في مهن لا تمت لتخصصهم التعليمي بصلة، وهو ما أثار استياء الفنانة المصرية بشدة ودفعها للرد، بتأكيدها أنها في بداية حياتها عملت كبائعة للوجبات الجاهزة في منطقة العتبة.
نشوى قالت: «طيب بمناسبة انى شيرت صورة لشباب زى الورد بيبيعوا بطاطا،وقلت عفارم عليهم انهم ما استسلموش للاحباط وللبطالة ولا قعدوا يولولو ويشتموا فى البلد، ونتيجة للردود اللي بعضها سخيف وبيقولو لى انتى فنانة بتاخدى فلوس اد كده ومش حاسة بالشباب المحبط وعايزانا بعد مانتخرج من كلياتنا المحترمة نبيع بطاطا، عايزة اقول لهم أولاً.. ابويا الله يرحمه كان من الطبقة الكادحة الطبقة تحت المتوسطة بشوية كتير.. ابويا ربانى انى اكون راجل.. بمعنى انى لما اتخرجت ومالقتش شغل عملت وجبات جاهزة فى البيت وبعتها فى العتبة للبياعين اللي بيشتغلوا فى محلات الملابس».
وأضافت: «ليه العتبة بالذات.. لانى فى اجازات الصيف بتاعت الجامعة كنت بشتغل بياعة فى المحلات دى علشان يكون معايا فلوس زيادة عن المصروف اللي باخده من اهلى، وليه عملت وجبات جاهزة وبعتها؟.. لانى كنت عايزة ادرس تمثيل.. دخلت المعهد وابتديت تمثيل بعشر مشاهد فى ضمير ابله حكمت وكان أجري فى المسلسل كله ٢٥٠ جنيه..كنت ساكنة فى شبرا بيتنا اوضتين .. دلوقتى بفضل ربنا وبمجهودى انا ساكنة فى فيلا دورين بحمام سباحة فى ارقى مكان فى التجمع الخامس».
وتابعت: «اتعلمت فى مدارس حكومة وكنت باخد الكتب ببلاش فى الجامعة لانى كنت مقدمة مفردات مرتب والدى انها بسيطة.. دلوقتتى بفضل ربنا وبمجهودى ولادى جامعة امريكية والمانية.. ماحدش ساعدنى غير ربنا مافيش منتج دعمنى وادانى بطولة وانا استاهلها بجدارة.. اثبت انى بمشهدبن تلاته ممكن اسيب تأثير واحقق نجومية باشوفها فى كلام معجبينى فى كل مكان جوه مصر وبراها.. انا بشتغل بمجهودى.. اتحاربت وصمدت اتساومت وما استسلمتش لانى مؤمنة بحلمى ومؤمنة بأن ربنا مع اللي بيتعب.. حارب علشان حلمك وماتشتمش بلدك ولا ظروفك ولاتشتم الممثلين».
